伊禾比返咗尼日利亞踢非洲國家盃，施華用奇雲（Kevin Santos Lopes de Macedo）踢左翼，效果達到預期，同時由佢創造嘅十二碼，成為今仗全取三分嘅關鍵，富咸亦都重回主場勝軌。雙方禁區內埋門機會唔多，都係以遠射為整個進攻作結。安東尼羅賓遜近三場賽事踢足曬90分鐘，同奇雲嘅串聯做得唔錯。富咸進入十二月份表現都唔差，輸曼城、水晶宮同紐卡素都情有可原，今仗總算可以攞番三分，聖誕節前以23分排13位（距離第四位嘅車路士6分），結果都可以接受。森林近期走勢比較反覆，今場戴治似乎喺調動上面嘅演繹唔係太奏效，進攻更談唔上有點睛之筆。不過暫時嚟講，佢哋嘅位置還算「安全」。 🏴
