【On.cc】張學友《吻別》送走2025 新年願望希望世界和平「歌神」張學友在昨晚（31日）除夕假紅館舉行第310場《張學友60＋巡迴演唱會香港終章》演唱會，他表示沒想過自己還可以站在舞台：「老實講我唱咗41年歌，23歲出道，24歲出碟，我64歲仲有咁多人入嚟演唱會，陪我度過2025年最後一夜。」清唱《太陽星辰》及《你最珍貴》表謝意。學友又話自己的新年願望，是真心希望世界和平：「去年時，喺台上許咗個願就係世界和平，咁冇啦，冇乜點和平，但我講畀大家聽千祈唔好放棄自己許嘅願望，有啲人話扮咩偉大呀，但我唔係扮嘢，我想講如果呢個世界唔和平，我哋就大鑊，唔係講笑，我哋做娛樂嘅，邊個得閒睇你啫，走難先啦，所以我會許到呢個願望真係實現為止嘅，相信只要每個人心裡都帶住善意，每個人都做個好人，呢個世界一定會更加好，更加和平。」學友隨即做一字馬，他High爆問：「我今晚勁咗，有冇覺得我勁過63歲嗰陣？所以話年齡唔係代表乜嘢，唔可以完全影響我哋成為點樣嘅人，或者我哋可唔可以進步，相信只要想，一定可以繼續進步嘅，加油。」學友又謂自私的願望是身體健康，每日順順利利及開開心心，亦將這個願望送給全場觀眾：「記住願望唔可以即時實現，願望一路諗落去，未來嘅幾年，我可以繼續做演唱會，大家今晚睇得開心，我到70歲，你哋再嚟睇一次，唔得啫？」最後送上《吻別》2025年度演唱會正式圓滿結束。張學友同歌迷人一齊跨年。笑容十足！投入獻唱。張學友新年願望，是真心希望世界和平。張學友最後送上《吻別》告別2025。張學友想繼續進步。
