阿莫廉執教曼聯13個月以來第一次起用四人防線 ，用 4231陣式，曼聯成功喺主場贏紐卡素1粒。柏德列杜古先踢右邊，下半場中段轉去左邊，亦取得個人加盟曼聯差唔多一年以來嘅第一個入波。曼聯今季喺聯賽攻入13個死球入波（唔計十二碼） ，係英超球隊之冠。今場比賽佢哋控球率只有33.4%，係今季最低嘅一場，亦係差唔多兩年來喺英超嘅贏波比賽當中控球率最少嘅一場。阿莫廉賽後形容今場對比其他比賽，球隊踢得更艱難但亦都傾盡全力，下半場有段時間甚至乎佢哋後防排咗六個人，但亦都能夠守住對方每一次嘅傳中。紐卡素嘅路爾斯賀爾表現非常唔錯，推進同防守都好。但係今季聯賽佢哋作客只係贏咗一場，呢個係球隊衝擊更前位置嘅最大障礙；而今場一共有16次埋門，只有3次中目標。 🏴
