艺人Angelababy近日被传因为同内地综艺节目《奔跑吧》节目组不和，疑退出第十季节目，唔再做主持！虽然传闻不绝于耳，但佢一于少理，日前仲孖住因拍新剧《爱情应该有的样子》而传绯闻嘅小鲜肉赖冠霖，齐齐出席婚礼，但全程唔见佢老公黄晓明，唔通因为晓明有工作在身，所以唔得闲陪老婆？
百忙中都去观礼，据闻Baby同新娘子好老友，新娘子就系《爱》剧嘅女导演徐棱棱（又名徐圆圆），喺网友流出嘅短片中，见Baby打扮得好低调，又冇乜化妆，仲着住件款式好贴地嘅白色卫衣，明显唔想抢新娘子风头，靓，始终点挡都挡唔住嘅，素颜Baby依然系全场最索！
Baby艳光四射，成为全场焦点外，陪住Baby左右、19岁嘅赖冠霖，亦都系现场宾客嘅“八卦位”！呢对绯闻男友全程零避忌，反而仲一齐对住镜头热情挥手，Baby送出真挚嘅祝福：“祝圆姐和陈老师新婚快乐”，赖冠霖就笑得好甜，露出咗酒窝仔。唔少网民对Baby同赖冠霖呢对“姊弟CP”相当受落，虽然佢哋年纪相差13岁，但男帅女靓零违和，唔讲都唔知Baby已经32岁，仲话争啲以为佢哋系同一个年龄层添，唔知黄晓明觉得老婆同赖弟衬唔衬呢？
