呢個係佘詩曼演嘅Man姐
《新聞女王》有佘詩曼壓陣，加上以新聞部內鬥為題材夠吸睛，首周收視有24.4點相當亮麗。唔少網民都認為，阿佘劇中角色Man姐(文慧心）嘅造型以至做主播時嘅風格，都同曾經喺大台擔任主播嘅方健儀十分相似。
呢個係方健儀造live時嘅造型，Man姐個look的確似
佘詩曼被網民認為佢喺《新聞女王》嘅霸氣主播風格係參考方健儀
現時主要擔任活動司儀及培訓導師嘅方健儀(Akina)，日前開Live時都有提到《新聞女王》，不過佢話因為早前生病「咳到七彩」，有時間都會盡量休息，因此未有睇過劇集。但係Akina提到Man姐髮型似足自己時，就話呢個髮型keep咗幾年，更自爆原來自己嘅髮型師識得佘詩曼嘅化妝師，而呢位化妝師更加喺方健儀結婚當日化妝，相當巧合，亦難怪Man姐造型甚有Akina硬淨幹練味道。
方健儀
方健儀喺個live度都有提及過去嘅新聞工作，再次提到「香港冇主播，只有新聞報導員」。方解釋，主播角色類似主持，可以有個人觀點同睇法，海峽兩岸以至歐美地區傳媒都有主播，但香港嘅新聞報導員係將稿件讀出，任何改動都要編輯同意，所以對方健儀嚟講兩者大有不同。
