衢州演唱會生圖流出42歲鍾欣潼被指身型疑再反彈

現年42歲嘅組合Twins成員鍾欣潼（阿嬌），近年轉戰內地市場發展，人氣仍舊高企，不過佢時肥時瘦嘅身型經常都會成為網民嘅焦點，好似佢曾因荷爾蒙失調變得肥腫難分，及後參加內地綜藝節目《乘風破浪》第三季成功減肥，重回顏值巔峰。近日Twins出席 “緣來有你”全明星演唱會-衢州站，期間佢哋唱出經典歌曲，雖然勾起唔少人嘅青春回憶，但唱功就再度被批評。除此之外，阿嬌嘅身型再一次備受關注，因為佢嘅生圖喺網絡流出後，唔少網民都話阿嬌體重好似反彈。

早前，Twins為 “緣來有你”全明星演唱會-衢州站演出，阿嬌著上黑色型格皮裙，配上黑色長靴，依舊明艷照人，散發出陣陣迷人氣質。唔少人將當日拍攝嘅影片及生圖上載到社交網站，令阿Sa及阿嬌嘅真實外貌及身形曝光，而阿嬌本人亦有將當日嘅造型靚相上載到微博與粉絲分享。生圖喺網絡流出後，隨即引起網民熱烈討論，因為官方照片及生圖有出入，雖然唔少網民都大讚阿嬌好靚，五官非常精緻，不過都有網民認為阿嬌好似反彈，真人唔係網絡講到咁瘦，及認為造型太緊唔好睇。