拿坡里連續四場比賽用同一套陣容，全部都能取勝，包括兩場意大利超級盃同兩場聯賽，擊敗AC米蘭、博洛尼亞、拉素同基蒙尼斯。阿拉文尼（Amir Rrahmani）自2024年12月之後，第一次喺意甲取得入波。艾馬斯今場後上埋門有點威力，有一次頭槌中楣。拿坡里近14次喺聯賽作客拉素9次贏波3次打和，只輸過兩次。拉素由於卡斯泰奴斯快將落實加盟韋斯咸；戴亞（Boulaye Dia）又要參戰非洲國家盃，只得路斯連（Tijjani Noslin）一個正宗前鋒。佢同馬路錫（Adam Marušić）今場都被逐離場，拉素今季已經總數攞咗七張紅牌，係咁多隊當中最多。佢哋今場嘅專注度同壓迫嘅一致性，都不及對手，場面就顯得比較被動，左後衛盧卡柏歴連尼（Luca Pellegrini）防守尤其顯得吃力。摩西堅恩一箭定江山，係費倫天拿今季聯賽第二次由後備球員取得入球。「紫羅蘭」自從10月23號之後，第一次保持清白之身。法基奧利同哥姆素係今場費倫天拿踢得最淡定、最穩妥嘅兩位球員，前者嘅傳送同控制節奏做得唔錯。佢哋今仗繼續踢4231 ，柏利斯踢右翼；碧高利嘅水平大概都係咁上下，但中場嘅尼杜亞同樣低迷，而且角色並唔清晰。由托定咸熱刺加盟嘅以色列翼鋒蘇洛文（Manor Solomon）後備登場先踢右邊，再去左手邊，佢嘅盤扭能力同傳中質素係給予一定幫助，加上費倫天拿確實缺乏呢類型球員。基蒙尼斯都好小心謹慎，早喺29分鐘已經換走攞咗黃牌嘅邦度（Warren Bondo） ；菲臘普特拉贊奴同巴斯基洛圖嘅防守係做得唔錯。意甲第18週賽事賽果-卡利亞里0-1 AC米蘭科莫1-0 烏甸尼斯薩斯索羅1-1 帕爾瑪熱拿亞1-1 比薩祖雲達斯1-1 萊切亞特蘭大1-0 羅馬拉素0-2 拿坡里費倫天拿1-0 基蒙尼斯維羅納0-3 拖連奴國際米蘭3-1 博洛尼亞 🇮🇹
