今季首次玫瑰打比，昆夏7分鐘就送球入網，可惜薛斯高越位在先食詐糊。下半場本身表現唔錯嘅希雲（Ayden Heaven）走甩艾朗臣成為球隊失分嘅致命一擊。領隊阿莫廉近期值得稱讚嘅係對施亞斯（Joshua Zirkzee）嘅運用，後備入替之後第一腳觸球就助攻昆夏追和比數。列斯聯有卡華特利雲連續入球走勢告一段落，而奧卡科喺前線對尤路嘅衝擊極具威脅，令後者「有氣無啶抖」。利物浦作客卡雲別墅，各自有一粒入波都幾經波折，先被旁證判罰越位而需要經過半自動越位系統再推翻裁定入球有效。夏利韋遜倒戈有收穫，而客軍嘅韋斯就攻入今季第二個聯賽入波。利物浦今仗發揮不如主隊係事實，艾薩克同伊傑迪基都因傷缺陣，加基普被推上頂到最前，為球隊補時階段攻入一球，但球隊最後都係「臨天光瀨尿」。富咸後備入替嘅夏利遜列特（Harrison Reed）幾乎壓哨時間射入世界波追和比數到完場，呢位球員喺近三季只係入咗呢一球，不過就尤為珍貴，令「紅軍」錯過拉近與榜三球會之間嘅差距。中游大戰，愛華頓主場賓福特有泰高斯基送大禮導致半場落後。連續6場食齋嘅伊哥泰亞高第一次喺英超上演帽子戲法，莫耶斯可以話一盤冷水照頭淋，球隊中後場過多失誤，都幾難搞。曼城半場完全壓住車路士來砌，夏蘭特早段就有一次黃金機會錯失咗；賴達斯嘅入球有多少運氣，巴迪亞施利（Benoît Badiashile）嘗試搶走皮球結果俾佢攞番兼且封堵射門時又改變方向令菲臘佐贊臣（Filip Jørgensen）欲救無從。換邊之後車路士嘅表現搖身一變，將安素費蘭迪斯推前半格，以及換入安迪山度士（Andrey Santos）同迪納（Liam Delap）都有唔錯嘅效果，前者更有補時階段追和比數。頂替離任瑪利斯卡嘅臨時領隊卡林麥卡倫執教嘅首場賽事，作客成功逼和曼城攞番一分，值得欣喜！英超第20週賽事賽果-阿士東維拉3-1 諾定咸森林白禮頓2-0 般尼狼隊3-0 韋斯咸般尼茅夫2-3 阿仙奴列斯聯1-1 曼聯愛華頓2-4 賓福特紐卡素2-0 水晶宮托定咸熱刺1-1 辛德蘭富咸2-2 利物浦曼城1-1 車路士 🏴
